व्यंग्य : बेसारोपदेश

प्रिय खेलाडी,

तिमी बेसार खाऊ ! बेसार खाऊ भनेर आग्रह गर्दा तिमीलाई अचम्म लाग्ला। तर अचम्म नमान्नु। बेसार सर्वगुण सम्पन्न खाद्य पदार्थ हो। यो एन्टिबायोटिक पनि हो। खेलाडीको मस्तिष्कको विकासका लागि यो अत्यावश्यक छ।

खेलाडीले शारीरको अझ धेरै ख्याल गर्नुपर्ने हुन्छ। त्यसैले तिमीले अझै धेरै बेसार खानु। खान मन लाग्दैन भने जिउमा दल्नु। त्यो पनि मन लाग्दैन भने सिरानी मुनि राख्नु। त्यति पनि नसके किचेनमा राख्नु।

तिमीलाई कुनै उपाय मन परेन भने बेसार सम्झेर, मम भन्नु। यसले मनोवैज्ञानिक रुपमा बेसार खाएँ भन्ने लाग्छ र आत्मबल दह्रो हुन्छ।

मैले अघि पनि भने बेसार सर्वगुण सम्पन्न मसला हो। यसले सरुवा रोग त छेउसम्म पर्न दिँदैन। साधारण रुघाखोकी जस्ता अन्य रोगहरुसँग पनि डराउनु पर्दैन। तिनीहरु त आउँछन् जान्छन्। बेसार खाएर हाच्छ्युँ  गरिदिनु, तिनीहरु आफैं उडेर जान्छन्। गफ ला‘को होइन सँच्चै उडेर जान्छन्। बस् तिमीले तातोपनी खनु हाच्छ्यूँ–साच्छ्युँ गरिदिनु।

अब तिमीले चोट लागेर खेलबाट बाहिरिने दिनहरु सकिए। क्रिेकट बलर ! तिमी सुन, अरु देशप्रेमी, बेसारप्रेमी खेलाडी पनि सुन। फुटबल खेलाडीहरुले पनि लौ सुन, चोटले सताइरहन्छ होइन ? अब तिमीहरु कसैलाई यस्तो समस्या पर्दैन्। क्रिकेट फुटबल मात्र होइन भलिबलमा पनि यो तत्व असाध्यै काम लाग्छ। भलिबलका चोट लागेका खेलाडी सबैले सुन। मेरो यो आग्रहलाई अन्यथा नलिनु। मान्नु। र, बेसार खानु।

तिमीहरु सबैले बेसार खानु। तिम्रो फिजियोले, डाक्टरले यसलाई अन्यथा भन्न सक्छन्। मैले भनेको ध्रुवसत्य कुरालाई विदेशी मिलेर भ्रम फैलाउन खोज्लान। उनीहरुले रिसर्च गरेको भनेर तिम्रो फिजियो र डाक्टरलेजस्तै कुरा गर्लान। तर नपत्याउनु। उनीहरुले केही पनि जानेका छैनन्।

पश्चिमाहरु साच्चैकै बेवकुफ हुन्। उनीहरुको सिटामोल भन्दा हाम्रो बेसार कति गुणा राम्रो छ। जाबो सिटामोलले त टाउको दुखेको मात्र ठिक गर्छ। बेसारले साधाराण जोर्नी दुखाई देखि डिप्रेसनसम्म ठिक गरिदिन्छ। अब डिप्रेसनले कोही मर्नु पर्दैन।

त्यसैले तिमीले आजैबाट बेसार खानु। बल गरेरै खानु।

सरकारले यति लामो समयसम्म लकडाउन गरेको छ। खेल गतिविधि ठप्प छन्। तर तिमीहरु चिन्ता नलेऊ। यो तिम्रो चिन्ताको विषय होइन। तिम्रो चिन्ताको विषय हो फिटनेस। खेलका लागि तिमी फिट रहन जति जरुरी छ, तिम्रो फिटनेसको लागि बेसार त्यतिनै जरुरी छ।

त्यसैले तिमीले अब बेसारमा फोकस गर्नु। बेसार खाएपछि जाबो २÷४ वटा डल्ला फ्याँक्ने, मुंग्रो हान्ने, स्पाइकिङ गर्ने, खुट्टाले बल गुडाउने, मुक्का र लात्ति हान्ने काम त आफैं आउँछ। बेसार खाएपछि शरीर नै जगमग–जगमग भएर आउँछ। भित्रैबाट इनर्जी आउँछ्। र, नेपालले विश्वकप जित्छ।

तिमीलाई थाहा छ ? गत फेब्रुअरीमा अष्ट्रेलियाले महिला विश्वकप जित्यो, केही दिन अघि मात्र बायर्नले बुन्डेलिगा जित्यो। पाहोर साल लिभरपुलले च्याम्पियन्स लिग र म्यान्चेस्टर सिटीले ईपीएल पनि बेसार खाएरै त जितेका हुन्।

मैले तिमीहरुलाई मात्र होइन एकपटक मेरा गाउँले लाई पनि यस्तै कथा सुनाएँ। त्यसपछिको मेरो जयजयकार त... ओको ! विर्सनै नसकिने पो थियो। तर एक जनाले विचमा टोकिहाले, कुन अन्तर्राष्ट्रिय खोजकर्ताले यस्तो भने ?

त्यतिबेला म मनमनै खुब हाँसे। मलाई उनी खुब मुर्ख लाग्यो। मैले उनलाई भनिदिएँ ‘मैले भनेपछि कुनै अन्तर्राष्ट्रिय खोजकर्ताको पुष्टी खोज्नु जो कोहीको पनि मुर्खता हो।’

के मेले गलत भनेँ ?

मेरो यो महान स्वास्थ्य टिप्स कसैले नकार्न सक्छ ?

सक्दैन ! कसैले सक्दैन !

यस्तो विचारको लागि मलाई मन्दिरमा राखेर पुजा गरिनु पर्छ। पवित्र बेसार र तातोपानीले अभिषेक गरिनु पर्छ। मलाई लाग्छ अब यो बेसारोपदेश नयाँ धर्म बनेर सबै खेलाडीले स्विकार गर्नु पर्छ।

त्यसैले म आह्वान गर्छु आऊ, बेसार खाऊ बुद्धि बाढाऊ, अध्यात्म जगाऊ। तर तर्क नगर।

बेसारोपदेशको मध्य खण्डमा म आग्रह गर्दछु कि – मैल भनेको मात्र मान। मैले भनेको मात्र सुन्। मैले भनेको मैले जसरी नै बुझ। तथ्य खोज्ने भन्दै मेरो भनाईमाथी कसैले शंका नगर।

मैले बेसार उब्जाउका लागि १० अर्ब लगानी गरेको छु। यसको चर्चा चौध लोकमै हुनु पर्छ। ब्रह्माजी देखि चित्रगुप्त सबैले थाहा पाउनु पर्छ भनेर मैले किताब प्रकाशन गर्ने विचार गरेको छु। जसमा बेसार कसरी रोप्ने देखि कसरी केलाउने सम्म सबै ज्ञान हुने छ।

तिमीलाई यी सबै कुरा झन्झट लाग्छन् ? यस्ता सबै समस्याबाट पार पाउन चाहान्छौं ? उसोभए एक फाँको बेसार खाऊ। हाच्छिउँ–साच्छिउँ गर। सबै ठिक भइहाल्छ।

यसमा हाम्रा साथीहरुले थप अभ्यास गरेर डिजिटल बुट्टी ल्याउनु भएको छ। यसलाई ‘भाइरस रिमुभिङ कार्ड’ नाम दिइएको छ। त्यो लगाउनुहोस्। रुघाखोकीले छेउ पनि भेट्दैन्।

सायद तिमीलाई त यतिले पुग्छ होला भन्ने मलाई लाग्छ। तर तिम्रो संघको अवस्था हेर न लगभग सबैले राम्ररी काम नै गर्न सकेको छैन्। यसको विवाद देख्यौ भने तिमीलाई रन्को छुट्ला।

सकुनी र पाँच पाण्डवको गेम जस्तो लाग्छ काइ कोइबेला हाम्रे खेल संघको अन्तरंग चित्र। त्यसमाथी खेल परिषद्मा दर्ता भएका झोले संघ देख्दा त दिक्दारै लागेर आउँछ।

यसकारण मैले एक जन्म जन्मान्तर काम लाग्ने उपाय सोचेको छु। अब सबै खेल संघलाई विघटन गरिने छ र मेरो नेतृत्वमा ‘अखिल बेसार खेलकुद संघ’ गठन गरिने छ। त्यसपछि तिमीहरुले त्यहाँबाट बेसार÷जन्तर बुट्टीको सुविधा पाउने छौ। फलतः नेपालको खेलकुदले शिखर चुम्ने छ।

त्यति मात्र कहाँ होर ! अब पुरस्कारको स्तरले पनि अधिक उचाइका लिने छ। पहिलो हुनेले स्वर्ण पदक पाउने छैन। बेसार पदक पाउने छ। सुन्यौ होइन ? बेसार पदक।

मैले तिमीहरुलाई पटक पटक भनेको पनि छु, म एक सशक्त खेलाडी पनि हो। मैले ऊ बेलामा बेसार खाएर पौडी खेल्न जाँदा सबै मलाई देखेर छक्क पर्थे। म साथीहरुलाई मेरै उदाहरण दिन्थेँ। भन्थेँ ‘लौ बेसार खाउ, तिमीले पनि मैले जस्तै खेल्न सक्नेछौं।’

तर हिन्दीमा एउटा उखान छ नि ‘भैसके अगे बीन बजाए, भैंस रहे पगुराय।’ उनीहरुले पनि  मेरो अघि त्यसै गरे। मलाई मजाकमा उडाए। मेरो होली प्रवचनलाई दुषित परिदिए। किनभने तिनीहरु संसारकै एक नम्बरका मूर्ख थिए।

अहो ! म त विषयभन्दा धेरै पर पुगिसकेँछु। तर तिमीलाई म फेरि भन्छु बेसारले सँधै फाइदा मात्र गर्दैन। यो जति औषधि हो त्यतिनै विष पनि हो। अनुचित समयमा यसको सेवन गर्यो भने यसले फाइदा गर्दैन्। बरु हानी गर्छ।

त्यसैले विशेष अवस्थामा मात्र यसको सेवन गर्नु। अन्यथा नगर्नु।

बेसार औषधिका नाममा मोर देन इनफ इज इनफ हो। यो जति खायो त्यति फाइदा। खेती नै गरे पनि मनग्गे खान लाउन पुर्याउँछ। कृषि क्रान्ति हुन्छ।

र, अन्त्यमा म तिमलाई भन्छु। म तिमीलाई असाध्यै माया गर्छु। आशा छ यो पत्र तिमीले चाँडै प्राप्त गर्नेछौं। तर पत्र प्राप्त हुने वित्तिकै मलाई पत्र नलेख्नु। किनभने म तिम्रो बेदना सुन्न सक्दिनँ। त्यसैले तिमीले पत्र नपठाएकै राम्रो।

पठाए पनि मैले पढ्ने छैन्। उसै तिम्रो हात मात्र दुख्ला। बरु मैले भनेको कुरालाई शिरोधार्य गर्नु, यो चिठीलाई मन्दिरमा राखेर पुजा गर्नु, विहानै बेसारको सानो टिको लगाउनु। म तिमीलाई पत्र लेख्दै गर्नेछु। अर्को पत्रको आश गरेर बस्नु।

उही तिम्रो

पिताम्बर